घरगुती गॅस तक्रारींसाठी अकोल्यात तक्रार निवारण कक्ष
अकोला, दि. २९ : जिल्ह्यातील घरगुती एलपीजी गॅसचे सुरळीत वितरण सुनिश्चित करण्यासाठी तसेच गॅसचा अवैध वापर रोखण्यासाठी जिल्हा स्तरावर विविध उपाययोजना राबविण्यात येत आहेत. याच पार्श्वभूमीवर अकोला येथील जिल्हा पुरवठा कार्यालयात “तक्रार निवारण कक्ष” स्थापन करण्यात आला असून, नागरिकांच्या तक्रारींचे तातडीने निराकरण करण्यासाठी हा कक्ष कार्यरत झाला आहे. सद्यस्थितीत पेट्रोल, डिझेल व घरगुती गॅस संदर्भातील तक्रारींवर त्वरित कारवाई होणे आवश्यक असल्याने, नागरिकांकडून दूरध्वनीद्वारे येणाऱ्या तक्रारींचे निवारण करण्यासाठी हा उपक्रम राबविण्यात आला आहे. या कक्षामध्ये अधिकारी व कर्मचाऱ्यांची नियुक्ती करण्यात आली असून, तक्रारींवर तत्काळ प्रतिसाद दिला जाणार आहे. जिल्हा पुरवठा अधिकाऱ्यांनी नागरिकांना आवाहन केले आहे की, गॅस एजन्सींमध्ये अनावश्यक गर्दी टाळावी. गॅस सिलेंडर संदर्भात कोणतीही अडचण किंवा समस्या असल्यास हेल्पलाईन क्र: ८०१०१५३७८० हेल्पलाईन क्रमांकावर संपर्क साधून तक्रार नोंदवावी. नागरिकांच्या तक्रारींचे योग्य व जलद निराकरण करण्यात येईल, असेही त्यांनी स्पष्ट केले.
