अकोल्यात शिकणाऱ्या तरुणीची नाशिकमध्ये हत्या; प्रियकरासह दोघे अटकेतप्रेमसंबंधातील संशयातून गुन्ह्याचा आरोप; बेपत्ता तक्रारीनंतर उलगड

अकोल्यात शिकणाऱ्या तरुणीची नाशिकमध्ये हत्या; प्रियकरासह दोघे अटकेतप्रेमसंबंधातील संशयातून गुन्ह्याचा आरोप; बेपत्ता तक्रारीनंतर उलगड

अकोला / नाशिक : अकोल्यात शिक्षणासाठी राहणाऱ्या बुलढाणा जिल्ह्यातील तरुणीची नाशिकमध्ये हत्या झाल्याची धक्कादायक घटना उघडकीस आली असून या प्रकरणी तिच्या प्रियकरासह दोन आरोपींना पोलिसांनी अटक केली आहे. या घटनेमुळे दोन्ही जिल्ह्यांत खळबळ उडाली आहे. मृत तरुणी बुलढाणा जिल्ह्यातील सिंदखेडराजा तालुक्यातील रहिवासी असून शिक्षणासाठी अकोल्यात राहत होती. ती अचानक बेपत्ता झाल्यानंतर तिच्या कुटुंबीयांनी अकोल्यात सिव्हिल लाईन पोलीस स्टेशन येथे तक्रार नोंदवली होती. दरम्यान, नाशिकजवळील सौरूल परिसरातील निर्जन भागात तरुणीचा मृतदेह आढळून आला. ओळख पटविल्यानंतर प्रकरणाचा तपास वेगाने सुरू करण्यात आला. तपासादरम्यान पोलिसांनी मुख्य आरोपी अथर्व देशमुख (वय १९) व त्याचा साथीदार संदीप उर्फ सुमित सनाप यांना ताब्यात घेतले. प्राथमिक चौकशीत तरुणी व आरोपी यांच्यात मैत्री व कथित प्रेमसंबंध असल्याचे समोर आले असून, तरुणी दुसऱ्या व्यक्तीसोबत संबंध ठेवत असल्याचा संशय आरोपीला होता. त्यातून वाद निर्माण होऊन आरोपीने नाशिककडे नेत असताना तिची हत्या केल्याचा आरोप आहे. घटनेनंतर मृतदेह निर्जन भागात टाकून आरोपी फरार झाले होते. नाशिक शहर पोलिसांनी तपासाची सूत्रे हाती घेत तांत्रिक तपास व चौकशीच्या आधारे काही तासांत आरोपींना अटक केली. त्यांच्यावर खून व पुरावे नष्ट करण्यासह विविध कलमांखाली गुन्हा दाखल करण्यात आला असून शस्त्र आणि अन्य पुराव्यांचा शोध सुरू आहे. दरम्यान, तरुणी बेपत्ता झाल्यानंतर तक्रार दाखल झाली होती. त्यामुळे स्थानिकांमध्ये चर्चा सुरू आहे की प्रारंभीच तपास अधिक वेगाने झाला असता तर घटना टाळता आली असती का. मात्र पोलिसांनी तपास सुरू असून सर्व बाजूंनी चौकशी केली जात असल्याचे सांगितले आहे. प्रेमसंबंधातील संशय आणि भावनिक अस्थिरतेतून घडलेली ही घटना युवकांमधील वाढत्या गुन्हेगारी प्रवृत्तीबाबत गंभीर प्रश्न उपस्थित करत असून समाजात संताप आणि चिंता व्यक्त होत आहे.