मनपाच्या जन्म-मृत्यू विभागातील तीन कर्मचारी निलंबित
अकोला, दि. १२ मार्च : अकोला महानगरपालिकेच्या जन्म-मृत्यू विभागात नागरिकांना दाखले मिळण्यात होत असलेल्या विलंबाबाबत वारंवार तक्रारी येत असल्याच्या पार्श्वभूमीवर मनपा स्थायी समिती सभापती विजय अग्रवाल यांनी कडक पावले उचलली आहेत. विभागातील कामकाजात निष्काळजीपणा आढळून आल्याने तीन कर्मचाऱ्यांना निलंबित करण्याचे निर्देश प्रशासनाला देण्यात आले. यासंदर्भात गुरुवारी मनपा मुख्यालयात जन्म-मृत्यू विभागाची आढावा बैठक घेण्यात आली. या बैठकीस महापौर सौ. शारदा रणजीत खेडकर, मनपा आयुक्त डॉ. सुनील लहाने, उपमहापौर अमोल गोगे तसेच सभागृह नेते पवन महल्ले यांची विशेष उपस्थिती होती. बैठकीत नागरिकांना जन्म व मृत्यू दाखले देण्याच्या प्रक्रियेची सविस्तर माहिती घेण्यात आली. सीआरएस पोर्टलवर उपलब्ध असलेल्या नोंदींनुसार नागरिकांना तातडीने दाखले देण्यात यावेत, तसेच रजिस्टरमध्ये नोंद नसलेल्या प्रकरणांवरही तत्काळ कार्यवाही करून अर्जदारांना लवकरात लवकर दाखले उपलब्ध करून द्यावेत, असे निर्देश देण्यात आले. मात्र प्रत्यक्षात नागरिकांना कोणतेही ठोस कारण नसताना दाखल्यासाठी जवळपास महिनाभर प्रतीक्षा करावी लागत असल्याचे बैठकीत निदर्शनास आले. कर्मचाऱ्यांकडून समाधानकारक स्पष्टीकरण मिळाले नसल्याने त्यांच्या कामातील हलगर्जीपणा स्पष्ट झाला. तसेच काही महिन्यांपूर्वी निबंधक म्हणून कार्यरत असलेल्या डॉ. मनीषा बोरेकर यांच्या नावाचे व स्वाक्षरीचे टोकन अद्यापही नागरिकांना देण्यात येत असल्याचेही आढळून आले, ही गंभीर बाब असल्याचे सभापती अग्रवाल यांनी नमूद केले. या पार्श्वभूमीवर जन्म-मृत्यू विभागातील देवानंद तायडे, श्रीमती जामनीक आणि शरद डोंगरे यांच्यावर प्रशासकीय कारवाई करून निलंबनाची कार्यवाही करण्याचे निर्देश देण्यात आले. तसेच डॉ. फवाज खान (कंत्राटी वैद्यकीय अधिकारी) आणि शेख सरफराज (लिपिक) यांच्याबाबत नागरिकांकडून वारंवार तक्रारी प्राप्त होत असल्याने त्यांच्या कामकाजाची चौकशी करून त्यांची बदली इतर विभागात करण्याचे निर्देशही देण्यात आले. या बैठकीस नगरसेवक सिद्धार्थ उपरवट, संदीप शेगोकार, मनपा उपायुक्त विजय पारतवार, सामाजिक कार्यकर्ते रणजीत खेडकर, अफसर कुरेशी, संदीप गावंडे, किशोर वरोकार, मोहम्मद इलियास तसेच मनपा वैद्यकीय आरोग्य अधिकारी डॉ. रुची पहूरकर यांच्यासह जन्म-मृत्यू विभागातील कर्मचारी उपस्थित होते.
