स्थानिक लोकप्रतिनिधींच्या उदासीनतेमुळे अकोला विमानतळाचे काम रखडले आ. साजिद खान पठाण यांचा घणाघाती आरोप

स्थानिक लोकप्रतिनिधींच्या उदासीनतेमुळे अकोला विमानतळाचे काम रखडले

आ. साजिद खान पठाण यांचा घणाघाती आरोप

अकोला : मंगळवारी अमरावती विमानतळाचे उद्घाटन करण्यात आले असून अमरावती ते मुंबई उड्डाण सेवा सुरू करण्यात आली. अकोल्याच्या विमानतळ स्थापनेच्या ५० वर्षांनंतर अमरावती विमानतळ बांधण्यात आले तरी मात्र अकोल्याच्या आधी अमरावती विमानतळ सुरू करण्यात आल्याने हे अकोल्यातील स्थानिक भाजपा लोकप्रतिनिधींचे अपयश असून त्यांच्या उदासीन धोरणाने अकोला विमानतळाचे काम रखडले असल्याचा घणाघाती आरोप आ. साजिद खान पठाण यांनी केला. पुढे बोलताना आ. पठाण म्हणाले की, अकोला विमानतळाचे बांधकाम हे स्वातंत्र्यपूर्व काळात म्हणजेच १९४३ मध्ये झाले आहे. तर उलट अमरावती विमानतळाचे बांधकाम हे १९९२ मध्ये झाले आहे. म्हणजेच अकोल्याच्या ५० वर्षानंतर अमरावती विमानतळाचे बांधकाम झाले आहे. तर दुसरीकडे अकोल्यात गेल्या २५ वर्षांपासून भाजपाचे लोकप्रतिनिधी निवडून येत आहे. विमानतळाचा आढावा घेतला असता अमरावती पूर्वी अकोल्यात जमीन अधिग्रहण आणि लागणाऱ्या विविध तांत्रिक बाबींची पूर्तता होऊन अकोला विमानतळ सुरू होणे अपेक्षित होते मात्र स्थानिक लोकप्रतिनिधींच्या उदासीन धोरणांमुळे अकोला विमानतळाचे काम रखडले आहे. तर अकोल्या पाठोपाठ निर्मिती झालेल्या झालेल्या अमरावती विमानतळाचे आज मंगळवारी उद्घाटन सुद्धा झाले तर आता अमरावती विमानतळाहून अमरावती ते मुंबई हवाईसेवा सुद्धा सुरू करण्यात आली. विमानतळ सुरू करण्यासाठी अमरावतीच्या लोकप्रतिनिधींनी केलेला पाठपुरावा हा कौतुकास्पद आहे. म्हणून आज त्याचेच फलित म्हणून अमरावती विमानतळ कार्यान्वित झाले आहे. तर दुसरीकडे एअरपोर्ट अथॉरिटी च्या विविध नॉर्म्स मुळे आता अकोला विमानतळाहून फ्लाईट टेकओव्हर करणार की नाही याबाबत साशंकता आहे. तरी आगामी काळात अकोला विमानतळ सुरू करण्यासाठी आपण सातत्याने पाठपुरावा करणार असल्याची माहिती आ. साजिद खान पठाण यांनी प्रसिद्धी पत्रकाद्वारे दिली.