मनपा प्रशासनाने मालमत्ता धारक विरोधात पोलीस ठाण्यात तक्रार दाखल केली आहे. 

अकोला: शिवर येथील एका मंगल कार्यालय कडे आठ लाखाच्या वर मालमत्ता थकीत असल्याने मनपा प्रशासनाने मालमत्ता सील करण्याच्या कारवाईचा बडगा उचलला. मात्र कारवाईच्या दरम्यान मालमत्ता धारक यांनी कारवाईत अडथळा आणून कर्मचाऱ्यांसोबत अरेरावीची भाषा केली. यामुळे मनपा प्रशासनाने मालमत्ता धारक विरोधात पोलीस ठाण्यात तक्रार दाखल केली आहे. याबाबात सविस्तर वृत्त असे की, शिवर येथील पुर्व झोन अंतर्गत वार्ड क्र. अे-10 मालमत्ता क्र. 613, दुर्गा माता मंगल कार्यालय यांच्या कडे सन 2017 ते 2025 पर्यंतचा एकुण मालमत्ता कर रूपये एकुण 8,66,192/- थकित असल्याने, 26 मार्च रोजी सिलची कार्यवाही करण्यास मनपाचे अधिकारी कर्मचारी गेले होते. मनपा पुर्व झोनचे सहाय्यक आयुक्त विजय पारतवार, सहायक अधिक्षक तथा जप्ती पथक प्रमुख राजेश सरप, सहायक कर अधीक्षक देवेंद्रकुमार भोजने, कर वसुली लिपिक प्रकाश थुकेकर, लिपिक प्रफुल हंबीर, शिपाई कृष्णराव वाकोडे व सुरक्षा रक्षक संगिता शिंदे यांचा पथकात समावेश होता.कार्यवाही दरम्यान मालमत्ता धारक जगदिश मुरूमकार यांनी वाद निर्माण करून अधिका-यांशी अरेरावीची भाषा केली. तसेच वाद-विवाद करून सरकारी कामामध्ये अडथळा निर्माण केला. पथकाने ही बाब आपल्या वरिष्ठ अधिकाऱ्यांना सांगितली. त्यामुळे मनपा उपायुक्त गीता ठाकरे तसेच अतिक्रमण विभाग प्रमुख चंद्रशेखर इंगळे व त्यांची टिम घटनास्थळावर दाखल झाली. जगदीश मुरूमकार यांनी त्यांच्याशी देखील वाद केला. त्यामुळे अखेर विजय पारतवार यांनी जगदीश मुरूमकार यांचे विरुध्द एम.आय.डी.सी. पोलीस स्टेशन मध्ये तक्रार दाखल केली आहे.अकोला महानगरपालिका क्षेत्रातील नागरिकांनी आपला थकित व चालू वर्षातील मालमत्‍ता कराचा भरणा वेळेच्‍या आत करून सील, जप्‍ती व लिलाव सारख्‍या अप्रिय कारवाई टाळून मनपा प्रशासनास सहकार्य करण्‍याचे आवाहन प्रशासनाव्‍दारा केले आहे.